Abonu de temporada

Procedimientu pa la tramitación d’abonos de temporada 2021/2022 Estación Ivernal Fontes d’Inviernu

Apertura de la plataforma de recarga online: 18 de payares del 2021.

Apertura de plazu de recepción de solicitúes o incidencies per corréu electrónicu: 18 de payares del 2021.

Apertura de plazu de tramitación presencial: 19 de payares del 2021, n’horariu de 09:00 a 13:30 y de 15:00 a 16:45 hores, nes oficines centrales de la Estación.

 

Recarga online

Abonaos que yá dispongan de tarxeta chip y renueven cola mesma tarifa

Tienen que facer la renovación del so abonu al traviés del enllaz a la nuestra plataforma online: Renovación abonos Fontes d’Inviernu con tarxeta de temporaes anteriores.

El pagu na plataforma ha facese con tarxeta de débitu/créditu.

La renovación online ta operativa siempre y cuando se renueve cola mesma tarifa cola que l’abonu se renovare l’últimu añu d’activación.  

Si’l sistema nun reconoz la numberación del soporte o la tarifa reflexada al acceder nun ye la que se quier, nun hai que siguir cola renovación y tiene qu’unviase un corréu electrónicu a abonados@fuentesdeinvierno.com, indicando nome y apellíos, numberación de soporte, tarifa que se quier y los datos de contactu. Nós vamos ponenos en contactu pa xestionar la incidencia.

Hai que disponer del últimu soporte d’abonáu que tuviere operativu nel sistema de control d’accesos, con independencia de que se tramitare anteriormente en Valgrande-Payares o Fontes d’Iviernu. Grabada nel soporte encontrarán una numeración de 23 dígitos, que han introducise ensin espacios nin guiones.

En casu de renovar con tarifa familia numberosa, carné mozu, federáu o persona con discapacidá, habrá que mandar por email a la dirección abonados@fuentesdeinvierno.com, imaxe de la documentación qu’acreita esos descuentos pa completar correctamente’l procesu, indicando nel asuntu del corréu “documentación recarga online”.

La tarxeta va recibir l’activación al facer el primer pasu pelos tornos de los telesielles de primer accesu de les estaciones ivernales.

 

Tramitación per corréu electrónicu

Abonaos nuevos

Aquellos usuarios que vayan a abonarse por primer vez, habrán d’unviar un corréu electrónico a la dirección abonados@fuentesdeinvierno.com, indicando nel asuntu “nueva solicitud”, aportando esta documentación:

  • Solicitú d’abonu con datos personales.
  • Fotografía reciente en formatu JPG.
  • Imaxe del DNI poles dos cares.
  • Si ye’l casu, imaxe de la documentación acreditativa pa tarifes de descuentos. Consultar modelos pel reversu de la solicitú.
  • Facer ingresu o tresferencia bancaria nel IBAN nº ES4120480001763404000210, de Liberbank, del importe de la tarifa, incluyendo los 5 € del soporte, indicando como conceptu nome y apellíos del solicitante.
  • L’abonáu va recibir un corréu electrónicu de confirmación de la tramitación onde van indica-y les instrucciones pa la entrega del abonu.
  • Los abonos tramitaos en periodu de prepagu han recoyese nes oficines centrales de la Estación Fontes de Iviernu, a partir del primer día d’apertura al públicu de la Estación. Pue haber causes que faigan necesaria la entrega de los soportes nun sitiu distintu; de dase esti fechu, la Estación va comunicalo peles canales habituales (web y redes sociales).
  • Pa solicitúes tramitaes per corréu electrónicu fuera del periodu de prepagu, el solicitante va recibir confirmación de que l’abonu ta tramitáu, pa que pase a recoyelu peles oficines centrales de la Estación.

 

Tramitación presencial

La tramitación presencial va facese namás nes oficines centrales de la Estación Ivernal Fontes d’Iviernu, n’horariu de 09:00 a 13:30 y de 15:00 a 16:45 hores.

El pagu va poder facese n’efectivo, con tarxeta bancaria, o presentando xustificante de facer l’ingresu nel IBAN n.u ES4120480001763404000210.
Documentación qu’hai que presentar:

  • Solicitú d’abonu con datos personales p’abonaos nuevos; p’abonaos d’años anteriores, rellenar namás nome y apellíos, y los demás datos namás si hai cambeos.
  • Pa renovaciones, soporte d’años anteriores.
  • Semeya recién en formatu JPG, p’abonaos nuevos namás, o persones que yá tuvieren abonu de temporada y requieran cambiar de soporte, por perda o rotura, o cualquier otra circunstancia. (Costu del soporte: 5€).
  • P’abonaos nuevos, fotocopia del DNI peles dos cares.
  • Si ye’l casu, fotocopia de la documentación acreitativo pa tarifes de descuentos. Consultar modelos per detrás de la solicitú.
  • L’abonu de temporada va entregase (sacando causes de fuercia mayor) de la que se tramite.